[index]

1 Corinthiens 13

1 …. aiþþau klismo klismjandei.

2 jah jabai habau praufetjans jah witjau allaize runos jah all kunþi jah habau alla galaubein, swaswe fairgunja miþsatjau, iþ friaþwa ni habau, ni waihts im.

3 jah jabai fraatjau allos aihtins meinos, jah jabai atgibau leik mein ei gabrannjaidau, iþ friaþwa <ni> habau, ni waiht botos mis taujau.

4 friaþwa usbeisneiga ist, sels ist: friaþwa ni aljanoþ; friaþwa ni flauteiþ, ni ufblesada,

5 ni aiwiskoþ, ni sokeiþ sein ain, ni ingramjada, nih mitoþ ubil,

6 nih faginoþ inwindiþai, miþfaginoþ sunjai;

7 allata þulaiþ, allata galaubeiþ, all weneiþ, all gabeidiþ.

8 friaþwa aiw ni gadriusiþ, iþ jaþþe praufetja gatairanda jaþþe razdos gahveiland jaþþe kunþi gataurniþ.

9 suman kunnum jah suman praufetjam.

10 biþe qimiþ þatei ustauhan ist, gataurniþ þatei us dailai ist.

11 iþ þan was niuklahs, swe niuklahs rodida, swe niuklahs froþ, swe niuklahs mitoda; biþe warþ wair, barniskeins aflagida.

12 saihvam nu þairh skuggwan in frisahtai, iþ þan andwairþi wiþra andwairþi; nu wait us dailai, iþ þan ufkunna ….

[index]