[index]

Zürcher Bibel (1524)
Die erst Epistel zů den Corinthern 13

1 Wenn ich mit menschen und mit Englen zungen redte, unnd hette die liebe nit, so were ich ein doͤnend ertz, oder ein klingende schell.

2 Unnd wenn ich wyssagen koͤndte, und wüßte alle geheimnus und alle erkantnus, und hette allen glouben, also, das ich berg versatzte, und hette die liebe nit, so were ich nichts.

3 Unnd wenn ich all min hab den armen gebe, unnd ließe minen lyb brennen, und hette die liebe nitt, so wer es nichts nütz.

4 Die liebe ist dultmuͤtig unnd früntlich, die liebe yffert nit mit verbunst, die liebe ist nit wyderbaͤfftzend noch muͤlich, sy blaͤget sich nit,

5 ist nit unzüchtig noch schamper, stelt sich nit ungeschickt, sůcht iren nutz nit, ist nit bitter noch gaͤchzornig, sy mißt nichts zů argem,

6 froͤuwet sich nit des unbills, sonder sy froͤuwet sich der worheyt;

7 sy vertreyt alles, sy vertruwt alles, sy hoffet alles, sy duldet alles.

8 Die liebe faͤlt niemer mer. Es sye dann das die wyssagung uffhoͤren werde, und die zungen uffhoͤren werdind, unnd die erkantnus uffhoͤren werde.

9 Denn unser wüssen ist stuckwerck, unnd unser wyssagen ist stuckwerck.

10 Wenn aber kommen wirdt das vollkommen, so wirt das stuckwerk uffhoͤren.

11 Do ich ein kind was, do redt ich wie ein kind, unnd richtet wie kind, und hatt kindisch anschlaͤg. Do ich aber mann ward, that ich ab was kindisch was.

12 Wir sehend yetzt durch einen spiegel in einem duncklen wort, denn aber von angsicht zů angesicht. Jetzt erkennen ichs stuckswyß; denn aber wird ichs erkennen, glich wie ich erkent bin.

13 Nun aber blybt gloub, hoffnung, liebe, dise drey; aber die liebe ist die groͤssest under inen.

voir texte

[index]